Siglir tar il cuntegn

Header

audio
Cornelia Camichel Bromeis davart metter finamiras e far bilantscha
Or da Vita e cretta dals 11.07.2021.
laschar ir. Durada: 10:54 minutas.
cuntegn

Cornelia Camichel Bromeis Far finamiras e far bilantscha

Cornelia Camichel Bromeis ha fatg midada – cun um, 3 uffants e giat davent da Tavau amez la citad da Turitg. L’anteriura decana da la baselgia grischuna è a partir dal prim d’avust reverenda da la baselgia St.Peter a Turitg, sco emprima dunna insumma.

Nus ans scuntrain en la chasa-pravenda da St. Peter, amez la citad da Turitg. Qua è l'anteriura decana da la baselgia refurmada dal Grischun uss reverenda. Suenter set onns ha Cornelia Camichel Bromeis inoltrà sia demissiun – ella aveva fatg bilantscha:

Ina bilantscha è insatge che va si cun l’engaschament e cun la forza ch’ins ha anc. Cur ch’ins bada, ch’ins n’ha betg pli la forza, èsi forsa da midar insatge e betg dad esser memia superbi da finir ina giada. E dad avair il curaschi da ristgar da cumenzar insatge nov.
Autur: Cornelia Camichel Bromeisreverenda St.Peter, Turitg

Ella ha ristgà insatge nov ed è uss l’emprima dunna reverenda da St. Peter. La chasa-pravenda è ses nov dachasa – ma questa chasa è anc bler dapli: Ella cuntegna 500 onns istorgia da refurmaziun ed è cun nums sco Zwingli, Lavater e Jud ina spezia dad epicenter da la refurmaziun.

Quai è ina part dal discurs, che nus avain manà en la cuschina moderna da la chasa venerabla:

RTR, Isabelle Jaeger: Nus essan qua en la chasa-pravenda, gist sper la baselgia St. Peter. Co faschais Vus entamez tut quest pais istoric a chattar atgnas finamiras?

  • Cornelia Camichel Bromeis: «Nus vivain en noss temp ed igl è impurtant da savair danunder che nus vegnin, per ch’ins possia er ir vinavant e sviluppar vinavant la vita dals refurmads qua a Turitg, ensemen cun tut l’autra glieud che viva er qua.»

Vegnir qua en da porta a badar tut quai ch’è gia succedi quai è magari impressiunant?

  • «Gea, e quai m’allegra zunt fitg da scuvrir anc. Uss sai jau gist far damaun in funeral dad ina dunna, che avess damaun 279 onns. Ella è morta avant 206 onns ed ins ha chattà quell’ossa il 1973 sper la baselgia en la fossa da ses um, da quel fitg enconuschent reverenda Johan Casper Lavater. Ed ins ha chattà quella ossa en là ed ella è ida sco en emblidanza per in temp. Uss han ins decis da metter enavos l’ossa puspè en la fossa per ch’ella possia pussar en etern.»
Persunas en la plievgia.
Legenda: Il segund funeral dad Anna Lavater – in'impressiun da l'act funeber sper la baselgia St.Peter. Keystone

Er quai è impressiunant, quest cumenzament?

  • «Quai èsi. Jau sun uss propi sfundrada en questa tematica er dad in antecessur, dal pli grond antecessur ed jau ma met betg sut squitsch da stuair esser uschè impressiunanta sco quai che quel um era. Quai na fatsch jau betg. Igl è dentant fitg impressiunant da pudair sepulir sia dunna e da ma dumandar, ma, co ha ella fatg quai, quella dunna dad in reverenda, en temps ch’eran dal tuttafatg differents d'ozendi, che la baselgia era amez la societad e ch’ins fascheva er dispitas per tschertgar la teologia che turnava propi ed el era in ch’è sa participà vi da quest discurs en Europa cun Goethe ed auters vairamain fitg enconuschents da quel temp.»

Il prim d'avust cumenza Cornelia Camichel Bromeis sia carica sco reverenda da St.Peter – lura cun ina messa ecumena en il rom da l'acziun «Helvetia predgia!». Cun quella acziun cloman dunnas da la baselgia ad autras dunnas da far la predgia a l'anniversari da la Confederaziun per undrair uschia ils 50 onns dretg da vuschar da las dunnas.

audio
Cornelia Camichel Bromeis – far finamiras e far bilantscha
01:01:13 min, Vita e cretta dals 11.07.2021.
laschar ir. Durada: 01:01:13 minutas.

Vita e cretta 08:00

Artitgels legids il pli savens

Scrollar a sanestra Scrollar a dretga