Il grondius creatur, il fervent guerrier, il victur traglischant. Tut quels ideals eroics han ils umens stgaffì per sasez. Ma quels ideals han er adina puspè fatg dubitar e desperar els.
L'exposiziun «Der erschöpfte Mann» en il Museum naziunal svizzer a Turitg sa deditgescha als differents ideals eroics dals umens ed a la virilitad en la crisa.
Il guerrier Achilles, spussà da la battaglia, l’uschenumnà Dieu da ballape Zinédine Zidane a la pauc bella fin da sia carriera, Johnny Depp che bragia. Tut en tut ovras d’art or da dus millennis istorgia culturala europeica, che stattan en stretg connex cun quels ideals – e cun il naufragi da l’um en quest reguard.
Nus mussain eroxs da l’antica, ch’han fatg naufragi e chavaliers, spussads da la battaglia. Dentant era artists dal ventgavel tschientaner, ch’èn a la tschertga da sasez.
Vita e cretta ha visità l’exposiziun cun il curatur Stefan Zweifel ed ha dumandà el, co che l’ideal masculin è sa midà entaifer ils davos tschientaners, tge che l’um ha emprendì da ses sbagls cun il temp. E – tge rolla che la dunna ha.