Vita e cretta - «Nus na savain betg surlaschar la Baselgia mo als conservativs»

Dentant datti plirs buns motivs da restar commember u commembra da la cuminanza religiusa, quai pretendan duas dunnas, che cumbattan dapi onns per l'egualitad da dretgs per um e dunna en lur Baselgias.

Sch'i dess in grond exodus, mancassan d'ina vart insacura las cumbattantas che procuran per progress, da l'autra vart mancassan era ils daners per la lavur sociala da las Baselgias localas

La teologa Li Hangartner sa regorda bain da temps cura che ir a messa tutgava tar la vita da mintgadi. Cura che quasi mintgin fascheva part da la Baselgia catolica u la Baselgia refurmada, senza metter en dumonda quai. Quai n’è betg uschè ditg passà, circa 50 onns.

Oz è la realitad in’autra: Mo pli sis da diesch persunas èn oz commembers e commembras da las grondas cuminanzas religiusas en Svizra, quai mussan las pli novas cifras da l’Uffizi federal da statistica.

In svilup che fa quitads a Li Hangartner, damai ch’ella chapescha era ils motivs, pertge che la glieud extrescha. Per ella sezza na vegn extrar betg en dumonda, era sch’ella – u gist perquai ch'ella – è ina ferventa cumbattanta per ils dretgs da las dunnas.

En il Vita e cretta preschenta ella ses motivs e pensiers.

Cun far part da la Baselgia procur’ins ch’il paun da mintgadi vegn era sin maisa tar persunas en miseria

Era Cornelia Camichel Bromeis, la decana da la Baselgia refurmada Grischuna, s’inquietescha da las bleras extradas da sia Baselgia. Pertge extreschan ils umans insumma propi da la Baselgia refurmada? E cun tge mesiras reageschan ils responsabels da la Baselgia per franar quest svilup? Gidan era projects digitals per s'adressar meglier a giuven e vegl?

Igl è dal tuttafatg gist, ch'ils umans dastgan decider sez da betg sa suttametter ad instituziuns terrestras, era betg a la Baselgia refurmada. Per definir e descriver quella libertad dovri dentant anc adina la Baselgia refurmada.

Legenda: Cornelia Camichel Bromeis, la decana da la Baselgia refurmada dal Grischun MAD, © Stefan Hügli