Siglir tar il cuntegn

Header

audio
Il cumbat da sora Lorena Jenal cunter la persecuziun da strias
Or da Vita e cretta dals 05.01.2020.
laschar ir. Durada: 57:56 minutas.
cuntegn

Papua Nova Guinea Il cumbat da sora Lorena Jenal cunter la persecuziun da strias

La persecuziun da strias è in chapitel stgir da noss'istorgia. In chapitel che ha prendì sia fin en Svizra cun l’execuziun d'Anna Göldi l'onn 1782. Dentant betg dapertut sin il mund tutga quest fenomen tar il passà.

A Papua Nova Guinea ha la persecuziun da strias e striuns numnadamain pir cumenzà avant insaquants onns. Ina che cumbatta cun corp ed olma cunter la malgistadad e tortura al lieu è Sora Lorena Jenal, oriunda da Samignun.

Sustegnair dunnas en structuras patriarcalas

Il 1979 ha Lorena Jenal pachetà sias valischs ed è emigrada a Papua Nova Guinea. Per ella èsi adina stà cler ch'ella veglia far lavur umanitara en l’exteriur.

Jau sun ida en claustra oravant tut per il motiv ch'jau leva ir a lavurar en la missiun. Quai era la suletta pussaivladad da suandar quai siemi.
Autur: Sora Lorena JenalMungia franciscana

Cura che Lorena Jenal è arrivada en il stadi pacific, aveva ella il sentiment ch'ella n'haja betg sulettamain traversà la mar, mabain era fatg in viadi enavos en il temp.

Jau sun arrivada a Papua Nova Guinea e na saveva betg crair, ch’i dettia anc insatge uschia. Ina natira intacta ed in pievel che n'è betg marcà ed influenzà da noss mund – in pievel originar.
Autur: Sora Lorena JenalMungia franciscana

Las problematicas principalas dals onns 80 e 90 eran sur tut ils conflicts tranter ils differents clans e la suppressiun da las dunnas. Uschia è Sora Lorena oravant tut s'engaschada ferm per la furmaziun, per ils dretgs da las dunnas ed ella surprendeva savens la rolla da la mediatura en cas da conflicts.

Modernisaziun sco raschun

Insacura è la digitalisaziun dentant era arrivada a Papua Nova Guinea. In fatg ch'ha catapultà il pievel papuan dal temp da crap en il mund digital e quai senza preparaziun. «Il pievel è surdumandà da tut quai», manegia Lorena Jenal.

L'emprima unfrenda da la persecuziun da strias ha Lorena Jenal salvà l'onn 2012. Dapi lura en 55 auters cas vegnids vitiers. Las persunas – per gronda part dunnas – vegnan tratgas ora, pendidas si vid ils mauns, torturadas cun stangas da fier e lura laschadas enavos. Varsaquantas èn mortas vid las consequenzas da las blessuras.

Quest atun è sora Lorena Jenal stada en Svizra per rapportar da sia lavur e sensibilisar per la situaziun en Papua Nova Guinea nua ch'ella è activa dapi 40 onns.

RTR Vita e cretta 08:00