Siglir tar il cuntegn

Header

audio
Cardientscha e misteri
Or da Vita e cretta dals 25.04.2021.
laschar ir. Durada: 02:55 minutas.
cuntegn

Pled sin via Cardientscha e misteri

Per Pastgas hai jeu giu da dar in’intervesta sur dalla levada, il misteri da cardientscha. Interessant, haiel tertgau, il misteri da cardientscha confruntaus cul mal el mund ha adina fascinau mei. La schurnalista tschentava damondas elementaras, concretas, silmeins tenor miu meini. Aschia ha ei dau in text.

Cura ch’el ei vegnius publicaus, haiel giu zacontas reacziuns specialas. Ei seigi halt karma, quei dil mal. Tgi che hagi discletg ella veta, tgi che vegni malsauns, seigi sez la cuolpa, quel stoppi halt sesviluppar. In che hagi per exempel cancer ni in down-sindrom, seigi «engreviaus karmicamein». Vul dir: quel hagi fatg enzatgei falliu e stoppi emprender da viver meglier. En tgei senn che quei «esser engreviaus karmicamein» vali gia avon che nescher, hai jeu buca propi capiu. Ins hagi dad ir tras pliras vetas per daventar in esser spirtal sco Jesus.

A mi ha quei dau da patertgar. Co sa in’intervesta sur dil coc da nossa cardientscha, numnadamein mort e resurrecziun da Cristus evocar talas reacziuns? Tgei ha la levada da far cun scenaris apocaliptics mischedai cun elements hinduistics? Gartegia ei buca pli a nus teologs da descriver il misteri da cardientscha sco mument da liberaziun buca mo dalla mort, mobein era da moralas profanas e squetschs seculars?

Jeu sai ch’il maletg dalla baselgia ha gia daditg sgreffels. Sch’ei vegn detg ch’ins duei far in plaid sin via che duei buca tunar sco en baselgia, san ins s’imaginar tgei sgreffels che quei maletg ha.
Ins vul zuar che la baselgia s’exprimi. Surtut a damondas existenzialas, nua ch’ei dat buca rispostas semplas. Per exempel il mal el mund. Aber quei che la baselgia ha da dir duei lu esser emperneivel, senza fauldas e flot e duei buca scurlar il carstgaun.

Gie, la baselgia semetta sezza magari bugen en tal comfort. Igl ei adina schon stau pli flot da senudar cul flum che da semetter en cun curascha el senn dil plaid da Diu. A mi vegn il profet Ezechiel endamen (34,2): «Paupra ils pasturs d’Israel che pasculeschan sesezs! Vessen ils pasturs buca da pascular las nuorsas?».

Igl ei adina schon stau pli flot da senudar cul flum che da semetter en cun curascha el senn dil plaid da Diu.
Autur: Christina Tuor-Kurthteologa refurmada

Jeu sundel leda ch’igl evangeli ei buca cumadeivels. Jeu sundel leda che la buna nova dil evangeli va vinavon, era sche la baselgia sfundra, sco in anteriur president dalla baselgia da Basilea ei s’exprimius ina ga.

Igl evangeli zaccuda numnadamein quel che selai en. Seschar en cun zatgei che nus enconuschin buc, fa tema; piarder ina persuna carezada, ni ina greva malsogna, quei sa dar viultas alla veta. Quei che zaccuda, quei che sforza nus da semidar, quei cunvegn il bia buca a nus. La cardientscha resta ina provocaziun. Aber viultas nunspitgadas arvan portas, portan nus vinavon. E quei ei il misteri.

RTR 08:45 Pled sin via;

Artitgels legids il pli savens

Scrollar a sanestra Scrollar a dretga