Il plaid suandont che Charlie Chaplin duei haver teniu a caschun da siu 70avel anniversari igl onn 1959 ei era oz da gronda valur:
«Cu jeu hai entschiet ad haver bugen memez hai jeu capiu, che jeu sun adina e da mintga caschun il dretg mument el dretg liug e che tut quei che schabegia ei bien. Lu hai jeu saviu esser ruasseivels. Oz sai jeu: Quei senumna confidonza.
Cu jeu hai entschiet ad haver bugen memez hai jeu capiu che emoziuns che fan mal e pitir ein per mei mo admoniziuns, damai ch’jeu vivel encunter la verdad che schai en mei. Oz sai jeu: Quei senumna autenticitad.
Cu jeu hai entschiet ad haver bugen memez hai jeu calau da vuler viver in’autra veta.
Cu jeu hai entschiet ad haver bugen memez hai jeu calau da vuler viver in’autra veta e hai cheutras entschiet a veser tut quei che schabegiava sco pusseivladad da crescher. Oz sai jeu: Quei senumna madirezia.
Cu jeu hai entschiet ad haver bugen memez hai jeu calau da prender naven a mi miu temps liber ed jeu hai calau da planisar projects pil futur. Oz fetschel jeu mo pli caussas che jeu fetschel bugen e da cor, che portan plascher e ventira e che fan surrir il funs dil cor - tut sin mia atgna moda e maniera ed en miu agen tempo. Oz sai jeu: Quei senumna sinceradad.
Cu jeu hai entschiet ad haver bugen memez hai jeu priu cumiau da tut quei che fuva buca sanadeivel per mei, da maglias, carstgauns, caussas e situaziuns e da tut quei che fageva mei adina puspei pigns, menava mei naven da memez. All’entschatta hai jeu numnau quei ina sauna fuorma d’egoissem, mo oz sai jeu: Quei senumna carezia enviers sesez.
Cu jeu hai entschiet ad haver bugen memez hai jeu calau dad adina vuler haver raschun - aschia hai jeu buca pli fatg tons sbagls. Oz hai jeu realisau: Quei senumna humilitad.
Cu jeu hai entschiet ad haver bugen memez hai jeu refusau da viver el vargau e da far quitaus pil futur. Uss vivel jeu mo pli en quei mument nua che tut ha liug. Aschia vivel jeu oz mintga di e numnel quei esser cunscients.
Cu jeu hai entschiet ad haver bugen mei dai jeu capiu che miu patertgar sa far mei paupers e malsauns. Cu jeu dai denton entschiet a sviluppar las forzas da miu cor ha il patratg survegniu in bien partenari. Oz numnel jeu quella cumbinaziun la sabientscha dil cor.
Nus stuein buca pli haver tema da cumbats, conflicts e problems - ni cun nusezzi ni cun auters – pertgei ei dat schizun steilas che scadeinan in’encunter l’autra ed aschia dat ei novs munds. Oz sai jeu: Quei ei la veta.»