Siglir tar il cuntegn

Header

audio
Pled sin via dad Ursin Defuns
Or da Vita e cretta dals 20.06.2021.
laschar ir. Durada: 03:06 minutas.
cuntegn

Pled sin via Daco musica?

Che la musica ha pitiu il davos onn san ins ni surveser ni surudir. Nos chors e nossas musicas han stuiu desister dad emprovas e concerts, da sentupadas e cumpignias.

Cantauturas, bands, tecnicists da tun e tribuna han buc astgau luvrar ed han pitiu donn. Las fiastas profanas ed ecclesiasticas han piars lur tarlischur, ed era il singul carstgaun ha pitiu; la vusch, las ureglias, il flad, la tenuta corporala, il spért e la cuminonza.

Savens hai jeu, cunzun duront mes onns sco dirigent dil Chor claustral, stuiu declarar e segiustificar enviers geniturs ed affons, daco che nus cantein e fagein musica. Daco che musica ei ina impurtonta part dall’educaziun e dil carstgaun insumma.

Immediat hai stuiu patertgar vid in fegl sgulond che jeu tegnel dapi onns en salv en in truchet e che declara a moda evidenta, gie bunamein naiva, tgei che musica sa tut muntar.

La musica ei buc mo ina part dallas scienzias humanas, ella ei era matematica. Ella ei in ulteriur lungatg, ella ei historia, ella raquenta denton era novas historias.
Autur: Ursin Defunsmusicist

La musica ei buc mo ina part dallas scienzias humanas, ella ei era matematica. Ella ei in ulteriur lungatg, ella ei historia, ella raquenta denton era novas historias. La musica ei activitad fisica, sport, magari schizun sport d’ault nivel. Sper il corporal lai ella dar nus in sguard ellas profunditads da noss’olma, en ils encardens ils pli zuppai dil cor. Ed ella muossa vi sil sempitern.

Sche nus cantein pia e fagein musica, sche eis ei buc per che nus daventien ils megliers, per che nus vegnien experts, profis, campiuns ni superstars.

La musica che ha muncau igl onn vargau, fa semplamein esser nus humans. Ella fa veser ed udir nus bellezias nunscuvretgas, ella ei la punt denter nus ed igl immortal. La musica lai sminar nus, ch’ei dat zanua sur las steilas in Creatur eifer las banalitads terrestras. Alfons Tuor ha scret «sur vus en tschiel leu vivan ils Spérts beai», e Beethoven ha componiu «über Sternen muss er wohnen».

Sil pli tard d’atun, cura che biars chors e biaras musicas entscheivan puspei cun lur emprovas, cura che bands e cantauturas ughegian puspei in pass sin tribuna, e cura che nus sedumandein forsa, sch’ei vala aunc la peina da sunar e cantar, lu duessen nus esser pertscharts: Musica ei nossa medischina, veta, ella ei il human en nus.

RTR 08:45 Pled sin via

Artitgels legids il pli savens

Scrollar a sanestra Scrollar a dretga