(vallader) Sco mincha religiun, ha eir la politica seis rituals e quista dumengia es darcheu uschè inavant: nus eschan clamats a las elecziuns federalas.
Fingià daspö eivnas pendan dapertuot ils placats cun lur slogans ed impromischiuns. Els muossan las candidatas ed ils candidats sco profets chi stan aint per lur missiun. Quels rian – ün plü bel co tschella – e’s mettan in parada per lur ideals. E pro mincha elecziun am fetscha darcheu la listessa dumonda: Che o chi sta davo quist rier?
Es quai ün chi cumainza a far fodas e da’s dissolver pro la prüma plövgia? Es ün chi’s muossa plain culur ed es listess be grischaint davovart, sco ils blers placats? O as tratta dad ün chi tacha tâlmaing chi nu’s rablarà bod na plü davent? E quantinavant correspuonda’l cun la persuna sül placat?
Be ün giavüsch piglia cun mai: quel, cha la glüschur aint ils ögls dals candidats refletta la glüschur in lur cours – ma Dieu sa… Nus gniaran a savair.
Il plü jent guardessa aint il placat per savair che chi’d es propi il cuntgnü. Ma la vistas süls placats, chi rian trasoura, nu tradischan – o nu tradischan amo. Perquai mettessa il plü jent tuot il plic sül palperi vegl.
Ma in quel mumaint vegn mincha jada darcheu adimaint il zitat dal vegl testamaint: «L’uman vezza be quai chi til stad avant ils ögls, Dieu però vezza il cour.» Sco pro l’elecziun dal rai David aint il vegl testamaint pudaina ans fidar chi’d es qua ün chi ha la plü gronda survista co nus e vezza plü profuond.
Quai am reconciliescha ün toc inavant cun la situaziun actuala sco electur. Eu nu poss e nu stögl neir na verer tuot e cugnuoscher la motivaziun fundamanetala da mincha candidata e mincha candidat. I da ün correctiv chi cugnuoscha quai chi tillas sta propi a cour.
Eleger nun es perquai forza ün act da cretta, ma ün act da fiduzcha: Invers ils candidats e las candidatas, cha lur vista süls placats sun ün toc inavant ün spejel da lur cour e invers Dieu chi cugnuoscha lur motivaziun.
E lura es eir ün act dad umiltà e sincerità da mai svess, da savair chi da inchün chi cugnuoscha eir mia motivaziun pro mincha elecziun.
Be ün giavüsch piglia cun mai: quel, cha la glüschur aint ils ögls dals candidats refletta la glüschur in lur cours – ma Dieu sa… Nus gniaran a savair.