Siglir tar il cuntegn

Header

audio
Pled sin via d'Anja Felix
Or da Vita e cretta dals 03.01.2021.
laschar ir. Durada: 2 minutas 58 Secundas.
cuntegn

Pled sin via Giavischs

Jeu pacheteschel ora il niev calender pigl onn 2021. In tec alla moda veglia ei quei, mo jeu sun franc buca la suletta che posseda aunc in calender analog sper igl electronic.

Quei ei mintg’onn in act bunamein festiv, sco da pigliar a mauns zatgei niev, aunc innocent. Empau sco dad ir sur neiv frestga gest curdada per tiara, nua ch’ins vesa aunc negins fastitgs.

Mo uonn hai jeu cun nudar ils termins gia fixai pils proxims meins, per in pign mument ponderau: Stuess jeu forsa aunc aschuntar enzennas da damonda davos quels termins? Nus vein gie empriu igl onn vargau, con incalculabel e malsegir che tut quei ei.

Dall’autra vart: La veta gioga adina in auter giug e pren buca risguard sin quei ch’ei planisau el calender. Quei savein nus buca pér dapi che quei virus dominescha nies mintgagi.

Atgnamein ha quei era siu bien, che nus essan vegni svegliai ord la cumadeivladad. E vein viu ch’ei dat cunfins pil carstgaun e che nus stuein setener ensemen. Nus essan gie individuums socials.

Ussa lasch jeu vegnir endamen quella dunna veglia che pudeva suenter biemaun strusch spitgar da metter naven il pigniel da Nadal. Quel veva zacons gis fatg siu survetsch en stiva e perdeva cun l’entschatta digl onn niev plaun a plaun sias guilas. La dunna metteva lu cun quitau tut las decoraziuns e cuclas da glas en veglias scatlas da cartun. E suenter scriveva ella sigl uvierchel: «Cun Diu» e leutier igl onn actual.

Biars onns ein passai aschia ed ins saveva leger bia cefras sigl uvierchel dalla scatla. Dad onns benedi ed onns d’uiara. E jeu tratgel: Quei onn da pandemia ha era siu plaz en quella retscha dad onns vargai.

Jeu scrivel vinavon mes termins el calender e sun spanegiada, tgei ch’igl onn niev porta. Giavischs vai jeu buc auters che avon in onn. Daco era? Ei buc il pli bi, dad entscheiver in niev capetel, senza il ballast dil vargau?

Cun Diu tras igl onn 2021! Las enzennas da damonda lasch jeu dalla vart. E fetsch persuenter in pèr enzennas d’exclamaziun tier notizias che desdan miu plascher.

Cun Diu astgein nus entscheiver in onn niev. E speronza era cun bia slontsch, fidonza e marveglias. E tut igl auter vegn a sedar sco ei sto!

En collavuraziun cun RTR publitgescha la FMR a partir dad ussa adina en la davosa ediziun da gasetta da l'emna il «Pled sin via». Quel è alura era d'udir mintgamai la dumengia tar RTR, en l'emissiun «Vita e cretta».

RTR Pled sin via 08:45

Artitgels legids il pli savens