Siglir tar il cuntegn

Header

audio
Il bambin va en la prolungaziun – Pled sin via d'Andri Casanova
Or da Vita e cretta dals 10.01.2021.
laschar ir. Durada: 2 minutas 48 Secundas.
cuntegn

Pled sin via Il bambin va ella prolungaziun

Tgei far cun las figuras sut il pigniel suenter il temps da Nadal? – Secapescha, prender e pachetar ellas bufatg en in scatla che va lu si surcombras ni giun tschaler. Biars han forsa gia fatg quei.

Cun dustar il pigniel, las cullas e las figuras da Nadal ein il patratgs magari gia tier il proxim Nadal. Aschia sesprovel jeu adina da metter naven tut tiptop ch'ei seigi ual semtgau per la proxima ga. La finala ei quei mintg'onn in mument tut special e festiv da puspei prender neunavon la decoraziun da Nadal.

Mintgin ha cheu ses rituals. Ils ins fan viandar Maria e Giusep las jamnas avon Nadal tras la habitaziun sco sch'els vessen da far il viadi a Betlehem. Ed ils auters fan si tut discus il pigniel e mettan suten las figuras sco sch'in aunghel vess giu en la detta.

Tals rituals avon e duront Nadal ein da gronda significaziun. Els dattan in'impressiun dalla muntada digl affon divin: Dieus ei daventaus a moda miraculusa carstgaun, in sempel carstgaun sco ti ed jeu. E per che Dieus daventi carstgaun han Giusep e Maria stuiu far ina via ed in process.

Aschia hai jeu uonn previu enzatgei niev. Jeu vi buca mo ver rituals cu ei va per far si pigniel e prender neunavon las figuras da Nadal. Na, era il mument da rumir duei survegnir sia atgna muntada.

Pia, va il bambin tier mei aunc buc ella scatla culla decoraziun da Nadal. El fa aunc ina via da siat gis cun mei. Duront quell'jamna duei el accumpignar miu dafar. El survegn in plaz special en miu mintgagi. Il meglier enzanua ch'el ei bein veseivels per tuts en casa. Forsa mettel jeu schizun ina fotografia ch'jeu vevel fatg cul bambin, sil visur la miu natel. Jeu vi pia far ina via cun el. Ed ensemen cun el vi jeu esser e daventar sapientivamain crastgaun, in carstgaun sco el.

RTR Vita e cretta 08:00

Artitgels legids il pli savens