Essas Vus era madirs per las vacanzas? Ils affons da scola spetgan gia dapi in temps vess sin las vacanzas da stad. Ed era ils carschi selegran sin viadis e la bialaveta.
Esser madirs, quei ei in’interessanta expressiun. Madirs, buca sco in meil ch’ei carschius bein ed ei buns da magliar. Ed era buca sco ina scolara ch’ei ida a scola ed ha contonschiu la maturitad, ni sco ina persuna che ha serrau giu zatgei cun success.
Tgi ch’ei madirs per las vacanzas ha tochen culiez la lavur ed il trot dil mintgagi – quel selegra da schar ruassar la lavur e da viver en in auter ritmus.
Mo atgnamein savessen nus era en connex cullas vacanzas sedumandar: Essan nus lu madirs persuenter? Gie, essan nus era promts per quei temps liber cun tut autra structura? Ei drova forsa era certas habilitads per passentar bein las vacanzas, aschia ch’ins tuorna buca trumpaus ni pli staunchels che avon.
Quel ch’ei madirs per las vacanzas, quel viva duront quellas pèr jamnas forsa cunscientamein auter che schiglioc duront igl onn.
Rita che lavura el marcau e sesa uras ed uras el tren, va duront las grondas vacanzas bugen a viagiar. Paul che viva persuls e vegn buca lunsch entuorn, ha finalmein giu la curascha ed ei s’annunziaus per in viadi cun ina gruppa che meina el en loghens ch’el veva aunc mai udiu. Simon va cun sia famiglia sper la mar, nua ch’el sa passentar ils gis senza in’ura che dictescha siu gi, e Gianna ha in’entira pluna cudischs ch’ella vul leger. Marc ha tschentau ensemen in grond program cun aventuras, quei en cuntrast cun sia veta ch’ei schiglioc ualti monotona. Annetta che ha sezza buc affons, accumpogna persunas impedidas en in camp da vacanzas. Carla va a campar culla famiglia e selegra da buca stuer organisar bia, mobein semplamein saver guder la cumpignia. E Hannes va en in bi marcau e viseta baselgias, quei che dess schiglioc mai el tgau ad el.
E tgei colligia tut quellas persunas? Ellas fan zatgei che cumpletescha la veta da mintgagi, forsa gest il cuntrari da quei che fatschenta els da luverdis. E quei senza cumparegliar cun auters, senza encurir rispostas, senza vuler anflar sligiaziuns ni stuer segiustificar. Gliez sa ruasseivlamein spitgar ed occupescha nus aunc baul avunda.
Per in cert temps astga zatgei auter star sil program, sco esser leghers ni pussar e survegnir energia. Sche quei reussescha a nus, lu essan nus propi madirs per las vacanzas.