Il temps da tscheiver ei vargaus e la cureisma ha entschiet. Mo quest onn ein bia caussas autras che usitau. Aschia ha negin priu giu la mascra da mesjamna dalla tschendra, cunquei ch'ins ha stuiu desister uonn da far tscheiver. Persuenter han autras mascras cuvretg nossas fatschas, quellas che duein proteger nus dil coronavirus.
Mascras – ellas zuppentan e protegian. Ual uss el temps da corona duein las mascras proteger nus dad ina infecziun. Mo el medem mument cuvieran ellas ina gronda part da nossas fatschas, aschia ch'igl ei mintgaton grev da distinguer tgei persuna che sezuppa davos la mascra. Duront il tscheiver perencunter cuvrin nus sapientivamein nossas fatschas, aschia che nus vegnin buca enconuschi. Nus savein midar noss' identitad u giugar ina rolla che plai a nus.
Mo era igl onn ora portan biars carstgauns ina «mascra». Els sezuppan per exempel davos ina rolla che la societad spetga dad els. Auters sedattan dumiestis sco in tschut, mo en realitad ein els sco lufs scarponts che enqueran lur avantatgs sin donn e cuost da lur concarstgauns. Manzegnas e cugliunerias s'audan tier lur mascarada.
Mo ei dat era carstgauns che seprotegian e zuppan davos las mascras blessuras che auters carstgauns han caschunau ad els. Lur olma para dad esser ferma, mo davos la fassada sezuppa ina olma che enquera agid. E davos in surrir sfurzau sezuppa enqualga cordoli e solitariadad.
Mascras – ellas zuppentan e protegian. Mo en quei temps da corona hai jeu aunc fatg ina ulteriura experientscha cun las mascras. Sch'ins vegn orda stizun u ord il tren, lu fa ei bein da prender giu la mascra e da trer flad e sentir l'aria frestga. E tgisà, forsa fagess ei mintgaton era bein da prender giu las mascras avon nos concarstgauns e da mussar ad els nossa vera fatscha, senza tema e turpetg...
L’ura da religiun è ina oasa da tempra religius-meditativa cun novitads or dal mund da las religiuns, predi/meditaziun e dapli.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
