Siglir tar il cuntegn

Header

audio
Vita e cretta dals 09.05.2021
Or da Vita e cretta dals 09.05.2021.
laschar ir. Durada: 59:58 minutas.
cuntegn

Vita e cretta Wiborada 2021 – in’emna en ina cella

Sa laschar serrar en da libra voluntad en ina cella da 12 meters quadrats durant in’emna? Quai fan actualmain diesch umens e dunnas a Son Gagl per onurar la sontga Wiborada.

Per questa acziun han ins aposta construì ina cella là, nua che Wiborada era mirada en. L'acziun fa part dal project ecumenic «Wiborada 2021», che ha lieu dals 23 d’avrigl enfin ils 3 da fanadur a Son Gagl. Cun quel project less ins render attent a quella dunna, ch’ha vivì durant il dieschavel tschientaner e ch’era ordvart impurtanta per la citad da Son Gagl.

Gist perquai ch’ella aveva sa laschà mirar en e viveva sco inclusa, era la sontga Wiborada in uman da la libertad. Ella aveva sa deliberà da tut las normas da la societad, per exempel quellas che prescrivevan, sco ch’ina dunna ha da viver en il temp medieval.
Autur: Hildegard Aepliteologa ed inizianta da Wiborada 2021

Wiborada aveva decidì da sa laschar mirar en en ina cella sper la baselgia da St. Mangen a Son Gagl. La ha ella vivì sco inclusa ed ha sa deditgà a la spiritualitad e la religiun. Sia cella aveva nagina porta, dentant duas pitschnas fanestras. Cun guardar tras ina pudeva ella far part a servetschs divins. Tras l’autra, quella cunter anora, cussegliava Wiborada la glieud en dumondas da la vita e la religiun. Era auts dignitaris politics e spirituals tadlavan sin ses cussegl.

Ch’era umens, e cunzunt auts dignitaris spirituals e politics, tadlavan sin il cussegl d’ina dunna, è remartgabel.
Autur: Thomas Reschkespiritual catolic a l'universitad da Son Gagl

Tgi è in inclus u ina inclusa?

Avrir la boxSerrar la box

Quai eran umens e dunnas, che sa laschavan serrar u sa mirar en en ina cella u en ina pitschna chasa. Uschia pudevan els ed ellas sa deditgar cumplainamain al far uraziun. Inclus ed inclusas vivevan ina vita fitg simpla e modesta, ina vita en isolaziun.
Las cellas d'inclus ed inclusas eran savens construidas directamain en ils mirs da baselgias. Uschia pudevan ils inclus e las inclusas prender part a servetschs divins tras in fanestrin.
A partir dal 5avel tschientaner vivevan umans en inclusiun. Zunt populara è questa furma da vita stada en il 12avel ed en il 13avel tschientaner.

Wiborada aveva previs in’attatga dals Ungarais. Sin basa da sia recumandaziun avevan ins evacuà l’entira citad da Son Gagl anc avant l’attatga. Wiborada sezza era restada en sia cella ed era vegnida mazzada dals Ungarais l’onn 926. La martira è vegnida declerada sontga da Papa Clemens l’onn 1047. E quai sco emprima dunna insumma.

L’inizianta Hildegard Aepli declera l'impurtanza da la sontga Wiborada en Vita e cretta. Ed ella raquinta da sia atgn'emna sco inclusa en la cella.

audio
Pled sin via da Flurina Cavegn-Tomaschett
03:10 min, Vita e cretta dals 09.05.2021.
laschar ir. Durada: 03:10 minutas.

Vita e cretta 09:00

Artitgels legids il pli savens

Scrollar a sanestra Scrollar a dretga