Avant 22 onns han Patricia e Noldi gì l’idea da viver ina nova vita insanua auter. Gnanc in mez onn pli tard han la flurista e l’informaticher gì vendì lur affars e chasa, procurà per in visum e pachetà lur set chaussas en in container. Lur aventura ha manà els vi sur mar en il vest dal Canada. Els èn sa chasads en la regiun da Cariboo en il stadi British Columbia.
Nus n'avevan betg gronda idea, tge far qua. Simplamain ina giada insatge nov. Nus n’avain betg ponderà la massa. Nus essan simplamain ids…
Bler è ì auter che pensà, e pauc uschia sco quai ch'els l'avevan planisà. Enstagl da lavurar sin ses mastergn sco informaticher, ha Noldi cumenzà a far da tut las lavurs sin il bajetg. Ils Vincenzs han cumprà ina ranch ed han avert in restaurant. E lura è puspè tut ì tut auter che planisà.
Quai è stà il meglier che ha pudì capitar a nus. Nus n'avevan betg planisà da survegnir uffants, e lura è quest miracul capità. Noss figl Ryan è naschì.
Ils Vincenzs vivan sin lur ranch sper il Eastwood Lake. Noldi ha in affar da construcziun ed els fan il pur. Patricia cultivescha legums ed ervas medicinalas ch’ella dovra en sia pratica da medischina natirala. Il fegl Ryan che ha ussa 18 onns ha cumenzà a studegiar a l’universitad da Kamloops.
Ina famiglia rumantscha che viva ses siemi en la cuntrada selvadia dal Canada.