Battaporta va en claustra

Dominik, in nuncartent, vul passentar in temp en la claustra da Mustér. Burnout? Na. L'emna dals 30 da matg vegni a dar in diari online e discurs live en il Radio Rumantsch. Pli tard natiralmain in film.

Dominik Hardegger pusa vid in mir avant la claustra da Mustér. Bild in Lightbox öffnen.

Legenda da maletgs: Dominik Hardegger sa prepara sin la vita davos ils mirs da la claustra benedictina a Mustér. RTR, D. Hardegger

Pudess ins trametter noss redactur Dominik Hardegger en ina praschun? Quai fiss insatge che auters emetturs han gia fatg. Nus essan ans decidids da trametter Dominik per intgins dis en la claustra da Mustér.

Scuvrir ils misteris da la vita claustrala

Or da la claustra da Mustér vegn Dominik a scriver in diari multimedial cun texts, fotos, videos e forsa schizunt cun tuns. Quel temp accumpogna il redactur RTR ils paders durant l’oraziun, la messa – insumma durant tut las incumbensas e funcziuns quotidianas. Vinavant èsi previs da far discurs live en il Radio Rumantsch, quai davent dal studio regiunal da RTR a Mustér. Ultra da quai datti lura pli tard er in film (documentar) cun maletgs da la claustra ed intervistas.

Quai n’è dentant anc betg tut: er auters giasts da la claustra benedictina vegnan a pled en il diari online ed en il film. Durant quests dis na resta il focus betg mo sin ils
paders e lur mintgadi, nus guardain era davos las culissas da la claustra ed inspectain il conturn da quest stabiliment religius sisum la Surselva.

Ils discurs:

  • Mardi, ils 31 da matg, ca. las 11:20
  • Gievgia, ils 2 da zercladur, ca. las 10:30
  • Venderdi, ils 3 da zercladur, ca. las 11:20