En claustra - Diari: Venderdi

Oz na dumogn jau betg da levar las tschintg. Las davosas notgs eran per mai simplamain memia curtas. Suenter la duscha vom jau puspè a messa.

En baselgia Sogn Martin n’èsi insaco betg pli uschè fraid sco ils dis avant. Forsa sco ch’jau hai ditg: Ins sa disa. Las 45 minutas van spert. Jau stun gist sper l’orgla e giaud anc ina davosa giada quest tun empernaivel e sias vibraziuns.

Legenda: Pader Bruno turbla la vista durant la messa en baselgia Sogn Martin. RTR, D. Hardegger

Tge munta viver en claustra per mai? Viver en claustra munta per mai d’avair fatg la greva decisiun: Desister sin las libertads ed il luxus da la vita «normala», da suttametter a las restricziuns claustralas e da viver en ina cuminanza cun dis reglads.

Jau m’hai decis per la vita libra e probabel hectica, la vita deliberada da las incumbensas religiusas, la vita cun spontanitad ch’è tenor mai exact perquai interessanta. Ma l’opziun da star en claustra na vev jau sowieso betg.

Ensolver mangel jau cun Remo, el è era giast ed è entrà il medem di sco jau e va era a chasa oz. Cun el discur jau sur las experientschas en claustra, nus lamentain l’urari ed oravant tut l’emprim’uraziun. Simplamain memia baud. El n’ha dentant mai fatg part da quella, also na sto el era betg tugnar :). Lura vegn tuttenina frater Murezi e ma dat ina medaglia benedictina. Era sch’jau na sun betg religius hai jau grond plaschair da quest act. Grazia fitg! Grazia a tuts per ils discurs e per l’amicabladad.

Legenda: La medaglia ch'jau hai survegnì da frater Murezi. RTR, D. Hardegger

Enfin las diesch hai jau peda da bandunar mia chombra. Quai è fatg spert ed jau return a l’entrada da la claustra per dar enavos mias clavs, ina per la chombra, tschella per la clausura. Là cumpr jau era gist intgins regalins per quels che n’han betg gì il privilegi da passentar in’emna en la claustra a Mustér. Jau paj cun ina bancnota da 100.-, il rest va en cassa per la renovaziun da la claustra.

audio

[03.06.2016] La dovosa horda communists

03:19 min, ord RTR Audio dals 03.06.2016.

laschar ir. Durada: 3 minutas 19 Secundas.

Cun la messa hai jau finì giu mes dis en claustra, cun il discurs live en il radio cun Tobia prend jau cumià da Mustér. Jau vom cun sentiments talmain maschadads ch’jau na realisesch gnanc propi ch’il discurs ha lieu. Simplamain discurrer vi e nà.

Finalmain sun jau en il tren, jau ma legrel d’arrivar a Cuira. Ed in gist uschè grond plaschair èsi che mes uregliers da bluetooth van puspè.

Ah, betg chapir fallà, il temp en claustra è stà in bel ed interessant, ma a chasa ma sent jau simplamain il meglier a lunga vista.

Jau ma legrel sin ina fin d’emna cun mes amis. Forsa hai jau anc la forza dad ir a teater oz, ma era sche betg è la fin d’emna planisada, activitads cun mes amis. E tuttina datti anc muments ch’ins po decider spontan tge far. Uschia hai jau gugent quai.