Biro a chasa – Tge è en urden e cura èsi damemia?

L'uschenumnà «Home Office» daventa pli e pli part da noss mintgadi. Ma co è quai cun anc svelt far in telefon per la firma la saira suenter tschaina u guardar ils mails davent dal canapé? Quant savens ston ins esser cuntaschibel e co statti cun servetschs da pichet?

laptop e telefonin en in maun d'ina dunna
Legenda da maletgs: Lavurar a chasa è pli e pli derasà – ma quant è bun e tge è damemia. Pixabay

Ditg curt, pli aut ch'ins è entaifer la fatschenta e pli cuntanschibel ch'ins sto esser, u er pli bler che la firma dastga pretender. Propi adina cuntanschibel ston però be ils schefs esser. Psicolocs da lavur cusseglian en quest connex da duvrar dus differents telefonins, in per la lavur ed in per chaussas privatas.

Pichet: Maximalmain set dis al mais

Tenor lescha dastga in patrun laschar far insatgi maximalmain set dis al mais pichet. Suenter quels dis prescriva la lescha duas emnas senza servetsch da pichet. Tut tenor structura e grondezza datti però excepziuns da questa regla ed il patrun sto laschar ina tscherta libertad da dir na ad in servetsch da pichet.

Reglas er per il biro a chasa

Pli e pli blers pon er propi lavurar cumplainamain davent da chasa. Er qua datti però reglas: P. ex. dastga la lavur esser repartida sin maximalmain 14 uras. Pia sch'ins legia l'emprim mail da fatschenta la bun'ura, lura na dastg'ins tenor lescha betg pli lavurar suenter las nov la saira.

Sin palancà politic cursescha l'idea da schluccar questa regla. Psicolocs da lavur na sustegnan però betg quai, perquai ch'i na saja betg bun da midar directamain dal biro u dal computer en letg.

Autur/a: Gion Gieri Flepp