Biros da viadi - Tgi dovra anc quels servetschs?

Trivago, Airbnb, ebookers ed uschia vinavant – portals d'internet per cudeschar vacanzas existan bunamain senza fin. Malgrà questa concurrenza datti anc adina biros da viadi. Ins n'auda betg che la branscha patescha fermamain sut la revoluziun digitala.

Monika Meisser-Fluor
Legenda da maletgs: Monika Meisser-Fluor maina ensemen cun sia collega Alexandra Ragaz in biro da viadi a Cuira. RTR, Gierina Gabriel

Quai ch'ins vesia sulettamain en il biro da viadi sajan las uschénumnadas classas da tariffas. In sgol en la economy class saja repartì en 15 classas da tariffas, declera Monika Meisser-Fluor. Ella lavura dapi passa diesch onns en quest sectur.

Cura ch'ins sgol vegn creà – endisch mais avant la partenza – hajan ins anc a disposiziun tut las classas. «Pli plain ch'il sgol vegn e pli autas las classas», explitgescha ella. «Nus pudain tscherner, tge di ch'ins survegn la classa da tariffa la pli favuraivla.»

Empruvar ora hotels sin viadis da studi

«Fitg blera glieud è er surdumandada en l'internet, perquai che l'elecziun è gigantica,» di Monika Meisser-Fluor. Ella sezza saja schizunt surdumandada e leda, ch'ella haja ses sistems en il biro da viadi per tschertgar. Savens stoppian ils spezialists da viadi tedlar, ch'i na possia betg esser usché difficil da seser en biro e cussegliar cun agid dals catalogs e las stailas dals hotels.

Questa vista saja faussa, curregia Monika Meisser-Fluor. I dettia ils uschénumnads viadis da studi. Pliras giadas ad onn vegnian tut ils collavuraturs tramess sin viadi: «Nus giain lura en divers hotels e suttamettain quels ad in test, mangiain u dormin là. Uschia elegin nus ils hotels che nus vendin e recumandain als clients.»

Autur/a: Gierina Gabriel