Il motiv per il brischament a Steckborn è cler: Igl è stà in auto da model. Quellas construcziuns da model han accus da litium-polymer. Quels accus èn fins e levs, han 20% dapli energia che auters accus e perquai in'auta capacitad. Els vegnan duvrads per la construcziun da model, per autos electrics, per vehichels da solar ni sco accus da telefonins. Ils accus da litium-polymer èn fitg privlus. Els piglian svelt fieu. Ins sto esser precaut cun chargiar, conservar e transportar ils accus.
Qua in per tips:
Conservar: I dat spezialas cofras ni satgs per transportar ils accus da litium-polymer. Quels satgs han num «litium-polymer bag».
Chargiar: Ils accus na dastgan betg vegnir sur- ni sutchargiads. Ins sto chargiar els uschè ditg sco quai ch'igl è scrit en las instrucziuns. I dat era specifics chargiabattarias, ils «balancers». Ils accus da litium-polymer na dastgan betg vegnir chargiads cun chargiabattarias svelts. Uschiglio vegn l'accu surstgaudà.
Dismetter: Ins na duess betg dismetter igl accu en il rument, mabain dar giu el en ina stizun spezialisada ni ad in post da distribuziun.
