Co fan ins in «Fresspäckli»?

La scola da recruta sà esser in temp dir. Geniturs, amias, collegas u parents pon livgiar quel temp e motivar ils recruts: cun in «Fresspäckli».

Legenda da maletgs: RTR/ Flurin Clalüna

Sch'ins vul far in plaschair als militarists, lura è il transport da pachets enfin 5 kilos gratuit. Ins stò simplamaintg annunziar il pachet sco «Feldpost» ed agiuntar l'adressa dal militarist ch'ins vul far cuntent. Quella ins survegn dal recrut sez, ni dal biro svizer (+41 31 381 25 25).

Sco emplenir il pachet?

Cun quai ch'ils recruts n'han betg ina frestgera en stanza, sa fan surtut chaussas che tegnan ditg. Il pli popular èn salsizs, salam ni pulpa. Er dultscharias, tschigulatta ni bastunets stattan sisum sin la glista. Ma er insatge per leger sco in comic po esser ina bella variaziun per ils militarists.

Far attenziun èsi surtut cun alcohol – en caserna è quel scumandà. Sch'in recrut survegn per exempel ina buttiglia vin, sto el dar giu ella a ses superiur. Avant co ir a chasa survegn el puspè ella, ma durant l'emna n'ha el nagut da quai.

Autur/a: Flurin Clalüna