Co far in budget

In pèr francs per mangiativas, in quint d'assicuranzas u las novas rodas da l'auto - avair la survista quants daners ch'ins dat ora mintga mais è pretensius.

Purtret da simbol cun in maun che scriva insatge e daspera in apparat da far quints.
Legenda da maletgs: Far in budget n'è nagin striegn, gida dentant fitg per betg crudar en la trapla da debits. Keystone

Sch'in quint arriva lur da l'isch en u via la posta electronica ed ins n'è betg bun da pajar quel, lura fissi uras da far in budget. Dentant anc meglier fissi da far in gia pli baud, quai metta a cor il cussegliader da debits da la Crusch Cotschna, Placi Degonda.

En ina survista dal budget tutgan tut las entradas ed expensas ch'ins ha durant l'onn. Tar il grond post il abitar menziunescha Placi Degonda la regla da betg dar ora dapli ch'in terz da la paja netta. Quai dependia dentant era da la paja che stettia a disposiziun, e da posts pli gronds sco custs da leasing.

Betg d'emblidar èn era expensas nunspetgadas, quant spert hai num dad ir tar il medi u ch'il quint da taglia è pli aut che spetgà. La finala di Placi Degonda d'era sa tegnair vi dal budget sche quel stat ina giada nair sin alv.

Autur/a: Riccarda Müller