Co midan uras automaticamain il temp?

La fin d'emna proxima è in'ura pli curta che normal. Igl è numnadamain da midar l'ura. La dumengia bun'ura in'ura enavant, da las 2 sin las 3. Bleras uras fan quai dentant tut da sez, senza che nus stuain gidar suenter.

Jürg Niederhauser da l'institut federal per metrologia.
Legenda da maletgs: Jürg Niederhauser da l'institut federal per metrologia. RTR, Adrian Camartin

Uras da telefonins ni er svegliarins electronics midan tut da sez il temp. E quai grazia signals che vegnan u dal cosmos ni da la Germania.

Ils telefonins survegnan numnadamain lur signal da satelits che sa chattan en il cosmos. Els survegnan l'uschènumnà temp universal e grazia a GPS san els nua ch'els èn e pon uschia quintar vitiers ni trair giu las uras necessarias, uschia ch'il temp constat adina, quai declera Jürg Niederhauser da l'institut federal per metrologia, l'institut che sa fatschenta e guarda dal temp en Svizra.

Lura datti dentant er uras da func, sco per exempel svegliarins ni er bleras uras publicas, sco uras da baselgia. Quellas uras prendan adina puspè si contact cun il signal da func, e san perquai tge uras ch'i è. Quai signal da func vegn dal reminent da la Germania, datiers da Francfurt. Il motiv persuenter è simpel, uschia Jürg Niederhauser. Il signal che vegneva numnadamain da la regiun da Genevra na pudeva betg cuntanscher bain valladas alpina, il signal che vegn da la Germania dentant schon.

Autur/a: Prisca Bundi