Dumbrar munaida custa da nov tar la Banca chantunala

Tgi che vul laschar dumbrar sia munaida tar la Banca Chantunala Grischuna vegn quest onn magari a sfruschar ils egls. Da nov sto vegnir pajada ina taxa da 2%.

Munaida che vegn derschida en ina maschina da dumbrar.
Legenda da maletgs: Dumbrar munaida custa da nov tar la Banca chantunala. Keystone

Sco quai che la banca scriva sin dumonda da RTR, sajan en las filialas veglias vegnids allontanads ils dumbraders da munaida. Da nov stoppia la munaida vegnir tramessa a Cuira per dumbrar, tge che custia da nov 2%. Ils daners vegnan suenter il dumbrar mess sin il conto. En las filialas modernisadas datti dumbraders da munaida, era là èsi previs dinoltrar ina daxa da 2%. I dovria mo anc in update dal sistem da software, uschia la Banca Chantunala. Cun questa mesira vul la banca sensibilisar ils clients da duvrar dapli ils meds pli moderns sco la carta u il telefonin.

Sco quai che la banca Raiffeisen scriva sin dumonda da RTR, saja vinavant pussaivel da laschar dumbrar la munaida senza taxa. Tar las filialas che la Posta Svizra maina sezza èsi pussaivel da pajar cun munaida en rollas, e tar la Postfinance datti Postomans nua chigl è pussaivel da pajar munaida sin il conto, en il Grischun na datti per il mument dentant nagin da quels Postomats.

Autur/a: Federico Belotti