Electricitad ed ieli da stgaudar vegnan pli chars

Cun la strategia d'energia dal Cussegl federal van amunt ils pretschs per ieli da stgaudar e da la forza electrica. La mira finala da quai è da sbassar las emissiuns da CO2.

Forza electrica ed ieli per stgodar
Legenda da maletgs: Keystone

Il Cussegl federal vul augmentar ils custs per ina tonna CO2 da 84 francs sin 96 francs. Il liter ieli per stgaudar vegn cun quai circa 3 raps pli char. Sin ina famiglia da quatter persunas èn quai custs extra da radund 75 francs.
Il pretsch per forza electrica va amunt per radund 2 %. Da mintga ura kilowatt forza èn fin uss ì 0.8 raps en la cassa federala. En futur vegn quai ad esser 2.3 raps.

Spargnar forza pli attractiv
Ina finamira da la strategia d'energia è, da far vegnir pli attractiv mesiras per spargnar forza. E sch'il pretsch d'ieli va ensi vegn el pli pauc attractiv. Ins studegia ina giada dapli, da fabritgar enturn la chasa e far il stgaudament pli effizient.

Tenor l'Uffizi federal d'ambient van radund dus terzs da quels daners (ca. 800 milliuns francs) sur l'Assicuranza per vegls e survivents AVS puspè tar la glieud.
Il rest va per part en in fonds da tecnologia per promover novas furmas d'energia, energia «pli netta». Tschella part vegn duvrada per sanar chasas ed auters stabiliments.
Isolar pli bain, midar ora lingias veglias uschia che las chasas dovran en il futur pli pauca energia.

Autur/a: Flurin Clalüna