Il dretg canapé e la pasch en stiva è garantida

Atgnamain avess il canapé d'esser la mobiglia la pli cumadaivla en l'entira chasa. Ma blers canapés n'èn betg propi cumadaivels. Co far da cumprar la dretga mobiglia per la stiva.

Canapés da design vesan ora savens fitg bain ma cumadaivels n'èn els betg.
Legenda da maletgs: Canapés da design vesan ora savens fitg bain ma cumadaivels n'èn els betg. Keystone

Da cumprar il dretg canapé è ina procedura pli lunga, e savens realisesch'ins pir a chasa ch'ins n'ha betg cumprà il dretg. El plascheva en stizun ma a chasa na fa il canapé betg propi ina buna figura ed è era anc malcumadaivel. Intgins tips per chattar il dretg canapé gia en stizun:

1. Laschar temp per tscherner il dretg canapé
Savens vesa il canapé ora bain en il catalog ni sin la pagina d'internet, ma cura ch'ins è en stizun da mobiglias n'è il canapé betg empernaivel da seser. Quai vul dir empruvar ora ils canapés che plaschan e cunzunt laschar temp. Sco il «Ktipp» scriva èsi da seser ina mes'ura sin il canapé ch'ins vul la finala, pir lura possian ins dir sch'ins sesa era cumadaivel.

2. Mirar sin la dretga profunditad dal canapé
Il cas ideal è ch'ins po seser bain si dretg ed il medem mument ston ils pes esser giun plaun. Per persunas pli pitschnas po quai esser lura ina lunga tscherna pervi ch'ils canapés moderns han savens ina gronda surfatscha da seser. Per persunas che giaschan pli gugent sin il canapé èsi dentant pli nizzaivel e cumadaivel d'avair ina gronda surfatscha da seser.


3. Canapés moderns èn savens memia bass
Canapés bass guardan savens ora fitg elegant. Ma cunzunt per persunas pli veglias, pli grevas ni per persunas ch'han problems cun la schanuglia èsi malempernaivel da star si dals canapés. Per far il test, èsi en stizun da star si dal canapé senza ch'ins sto duvrar ils mauns, lura è l'autezza ideala.

4. Mirar che la spunda ha la dretga autezza
Ils canapés moderns han spundas plitost bassas. Il dischavantatg è lura che la spunda na sustegn betg il dies e per part taglian quellas er en el dies. Plinavant datti spundas ch'èn quasi sidretg. Gliez n'è lura sur in lung temp da seser betg propi cumadaivel. Il cas ideal è che la spunda va fin a las spatlas e ch'ella sustegn uschia bain la crusch e la batschida.

5. Memia loma pulstrada da seser
L'emprim cura ch'ins sesa sin in canapé lom è quai fitg cumadaivel. Cun seser pli ditg vegn il seser malempernaivel. Sch'il corp na sfundra numnadamein betg correct en la pulstrada alura n'èn gia las pli simplas manadas betg pli pussaivlas. Il tip: Seser in mument sin il canapé giavischà e cura ch'ins stat puspè en pe ed ins po vesair bain nua ch'ins è gist sesì, alura è la pulstrada memia loma.

Autur/a: Gionduri Maissen