Il principi da 3 pitgas segirescha nossa pensiun

L'AVS, la cassa da pensiun e la prevenziun libra duain segirar nus finanzialmain en la pensiun. Quai principi da 3 pitgas exista en Svizra dapi il 1972. Las pitgas èn fitg differentas e porschan differentas pussaivladads.

Segirar l'existenza, quai duai l'emprima pitga, l'AVS. Mintga emploià paja per mais 4.2% da ses salari en l'AVS. L'emploiader paja la medema summa. En la pensiun survegn mintgin persuenter tranter 1175.- e 2350.- francs. Quai tanscha dentant betg per salvar il standard da viver.
Perquai datti la segunda pitga, la cassa da pensiun. Mintgin ch'è emploià en Svizra e gudogna dapli che 21'150.- francs è lià ad ina cassa da pensiun. Era qua paja l'emploià e l'emploiader. Tscherts minimums èn fixads en la lescha, la gronda part vegn dentant reglada entras il reglament da las cassas da pensiun. Ils daners ord la segunda pitga èn normalmain la pli gronda cumpart da la renta.
Tgi cge vul anc pudair sa prestar in u l'auter luxus suenter la pensiun, po spargnar daners supplementars en la 3. pitga. En la pitga 3a, la prevenziun liada, po mintgin pajar ad onn ina summa maximala (actualmain 6768.-). Questa summa pon ins lura trair giu da la taglia. La summa spargnada po vegnir retratga il pli baud 5 onns avant la pensiun ni gia avant per finanziar in'immobiglia.

Autur/a: RTR, ul, sc