Ir cun uffants dad auters en vacanzas

Las valischas èn pachetadas, ils bigliets per il sgol èn pronts ed ils uffants èn agitads – uschia pon las vacanzas cumenzar. Ma, ir cun tat e tatta u cun la meglra amia en vacanzas po dar cumplicaziuns.

Viagiar cun uffants dad auters n'è betg uschè simpel.
Legenda da maletgs: Colourbox

Adina puspè aud'ins da cas che uffants èn vegnids rapinads dad esters, ma er dad ina part dals agens geniturs. Er per geniturs vala numnadamain ch'i dovra la lubientscha en scrit da l'auter genitur per pudair ir sulet cun ils uffants en vacanzas. Quest document dovri er sch'ins vul ir cun l'uffant dad amis en l'exteriur.

Il megler èsi dad er gist translatar il permiss en la lingua naziunala dal pajais ch'ins viagia u almain per englais. Uschia na ristgan ins betg da perder in u l'auter sgol perquai ch'igl è anc da sclerir la lubientscha.

Nagina furma fixa

Per il permiss na datti nagina furma fixa co igl è da formular. I dat dentant intgins puncts, ch'èn d'avantatg d'avair sin il document:

  • persunalias da l'uffant
  • persunalias da la(s) persuna(s) che piglia(n) cun l'uffant
  • data e durada dal viadi
  • nua ch'ins va

Autur/a: Natalia Murtas