Mal il chau – tge far?

Suffels e temperaturas enfin 19 grads – e quai la fin november. Actualmain dictescha il favugn l'aura en il Grischun. Ils ins sa legran da las temperaturas empernaivlas, las autras sa lamentan ed han mal il chau – dal favugn, ha i num. Tge far?

I dat sur 200 differents tips da mal il chau.
Legenda da maletgs: I dat sur 200 differents tips da mal il chau. pixabay, geralt

Baiver avunda

Sche pervi dal favugn ni betg: Encunter mal il chau datti differentas mesiras. Impurtant èsi da baiver avunda. Almain 1.5 liters aua manglass in creschì baiver per di. Quai sminuescha la pressiun dal saun ed el transporta avunda oxigen en il tscharvè. Vinavant èsi dad evitar canera, sulegl, alcohol, cafein e nicotin.

Attenziun cun pirlas

Pirlas encunter mal il chau gidan era. Dentant na manglass'ins betg prender pirlas pli ditg che trais dis en retscha, e betg dapli che 10 dis il mais. Uschiglio sai dar in mal il chau permanent.

Mineral miraculus

Sco mesira preventiva èsi recumandà da consumar avunda magnesium. Principalmain graun integral, legums e nuschs cuntegnan bler magnesium. I dat dentant era pirlas da magnesium. Vinavant èsi impurtant dad evitar stress e da durmir avunda e regular.

Laschar ir video «Pertge vegni chaud cun il favugn?»

Pertge vegni chaud cun il favugn?

2:22 min, Minisguard dals 8.1.2011

Autur/a: RTR/mc, Moderaziun: RTR/gj