Mattas fan politica

Mattas en il Cussegl Grond.
Legenda da maletgs: Il parlament da mattas, l'onn 2012. RTR, H. Schär

120 giuvnas tranter 13 e 16 onns sa radunan oz en il Cussegl Grond a Cuira per far politica. Oz ha lieu il segund parlament da mattas che vegn organisà dal post da stab per l'egualitad da schanzas. Las giuvnas discuteschan il suentermezdi davart ils fugitivs minorens betg accumpagnads e davart las pussaivladads dal temp liber. Las discussiuns vegnan manadas da la deputada Sandra Locher Benguerel ed ulteriurs menturs e menturas. A la fin ston las mattas sa decider per in tema, elavurar quel e surdar la petiziun uffiziala al president dal Cussegl Grond Vitus Dermont. Sco represchentant da la regenza è Martin Jäger da la partida. El cusseglia las giuvnas e dat resposta sch'i dat dumondas. Il parlament da mattas dess dar a las giuvnas la pussaivladad da guardar davos las culissas dal mintgadi politic e da far gust ad ellas da s'engaschar en futur politicamain.

Autur/a: RTR/dh