Ord da tge consista pavel da giats?

Quels ch'han a chasa in giat u era in chaun, quels èn segir gia sa dumandads tge ch'ì ha propi en il pavel da giat? Ma indicaziuns concretas sin las conservas mancan savens. Il magazin da consuments «Espresso» da radio SRF ha dumandà las firmas che produceschan il pavel.

In giat baiva ord ina tualetta.
Legenda da maletgs: In giat baiva ord ina tualetta. Keystone

Sch'ins mira precis sin la glista da las ingredienzas dat immediat in pled en egl. "Products secundars d'animals" per tudestg "Tierische Nebenerzeugnisse". E quai po esser tenor l'expert Stefan Wüthrich quasi tut la tocca d'in animal. Sco per exempel il gnirom, il cor ma era testiculs ni ivers. Scumandà èn sulet pauca tocca sco tscharvè, egls d'animals pli vegls. Da principi sto tut esser d'animals sauns e la gronda part pudessan era ils umans mangiar. Uschia sa preschenta il pavel da giats ord ina maschaida u in ragout da rests.

Quanta charn è propi en quest pavel

Il pli savens èsi inditgà da tge animal che la charn vegn. Ma schi'ns mira sin las indicaziuns alura variescha quai da product tar product. Savens èsi dentant inditgà ch'ì consistia da quatter pertschient da la charn inditgada.
Danunder che la charn vegn propi na stat betg sin il pachet, sulet il lieu da producziun è inditgà. Sco las retschertgas da «Espresso» mussan po la charn vegnir ord da l'entira Europa ni schizunt da l'entir mund.

Autur/a: Gionduri Maissen / Flurin Clalüna