L'onn passà ha Samsung purtà ina staziun da connexiun cun il num DEX sin il martgà. La finamira da questa staziun è da connectar il smartphone cun in visur grond ed uschia duvrar las applicaziuns dal handy sco ils programs dal computer.
Per programs betg cumplexs è quai ina buna chaussa. Dal tuttafatg po il pachet d'in telefonin, ina staziun da connexiun ed in visur dentant anc betg remplazzar il computer. In computer usità ha dapli funcziuns, in'autra architectura davostiers ed i na dat era (anc) betg tut ils programs da computer sco applicaziuns per ils telefonins.