Reducziun dal tschains pervia da donns

Tge ston ins far sch'ins vegn en ina nova abitaziun e quella ha gia ina fanestra ch'è betg isolada bain u la maschina da lavar che funcziuna betg? Natiralmain pon ins infurmar il propietari e sperar ch'el eliminescha il donn. Pon ins dentant era pretender ina indemnisaziun?

Controlla da la lavandaria.
Legenda da maletgs: Ins po pretender ina reducziun d'enfin 10% sche la maschina da lavar funcziuna betg. Keystone

Sch'ins ha donns en l'abitaziun lura han ins effectiv il dretg sin ina remuneraziun en furma d'ina reducziun dal tschains. E quai davent dal mument ch'ins ha infurmà il propietari davart il donn, enfin tar il mument ch'il donn è eliminà. Pertge il tschains è fixà per in object senza donns.

Quant auta che la reducziun è, ston ins fixar cun il propietari. Dentant porscha l'uniun da locataris girschuna ina glista cun cas da referenza che duain gidar da s'orientar. Uschia quintan ins per exempel cun ina reducziun d'enfin 10% sche la maschina da lavar funcziuna betg. U ch'ins sto pajar 20% pli pauc tschains sche la temperatura en l'abitaziun sa sbassa sin pli pauc che 16 grads sch'il stgaudament funcziuna betg u sch'i dat problems cun l'isolaziun.

Donns ordaifer l'atgna abitaziun

Però betg be donns en l'atgna abitaziun pon influenzar la qualitad da viver. Uschia po per exempel er canera esser in problem per ils locataris. Ed er en quests cas han ins la pussaivladad da pretender ina reducziun dal tschains.

Quai dentant be sch'i dat in augment da canera temporar dal qual ch'ins saveva anc nagut cura ch'ins ha suttascrit il contract. In exempel concret pudess esser lavurs da construcziun en il conturn. Sch'ins va però a viver en in conturn cun uffants u cun in'autostrada, lura ston ins quintar cun canera e na po consequentamain betg far valair ina reducziun.

Autur/a: Nora Baltermia