Schubregiar ils dents cun fil è out

Almain sch'i va tenor il ministeri da sanadad dals Stadis Unids na ston ins betg pli avair schletta conscienza sch'ins na dovra betg il fil da schubregiar dents. Il ministeri ha numnadamain stritgà il fil da la glista da cussegls. Motiv: I n'è betg cumprovà ch'il fil gidia.

Savens èn barschuns pli effizients e simpels da duvrar ch'il fil.
Legenda da maletgs: Savens èn barschuns pli effizients e simpels da duvrar ch'il fil. RTR, Gion Gieri Flepp

L'igienicra da dents Letizia Hendry ha gia 28 onns experientscha e n'ha sezza anc mai duvrà il fil da schubregiar tranter ils dents. Tenor ella è il fil be adattà per glieud giuvna che ha anc pauc spazi tranter ils dents e ch'è abla da duvrar il fil correctamain.

I dovria ina buna imaginaziun dal spazi per pudair manar il fil endretg enturn ils dents, per betg tagliar en la charn e per far davent la merda. Quai na saja betg dà a tuts. Perquai cusseglia la igienicra en ils blers cas alternativas.

Las alternativas èn triangul cun ina furma da trianghel ubain fitg pitschens barschuns cun in toc per tegnair da plastic. Cun quels giaja quai bler pli simpel ed i saja almain uschè effizient sco il fil.

Autur/a: rtr/ggf