Swisscom rimna datas

Il mument infurmescha la Swisscom tut ses clients che han ina rait fixa davart novas cundiziuns generalas da fatschenta. Dasper quai chatt'ins en questa brev, che va a plirs milliuns clients, ina decleraziun davart la protecziun da datas.

Il nov contract dat dapli cumpetenzas a la Swisscom
Legenda da maletgs: Il nov contract dat dapli cumpetenzas a la Swisscom

Questa decleraziun dat a Swisscom il dretg da duvrar las datas dal client per il marketing intern. Quai dentant mo a moda anonima, vul dir, nagin na duai chattar or a tgi che las datas tutgan. Sin basa da la lescha da la protecziun da datas federala dastga la Swisscom er far quai. Ins po dentant evitar che la Swisscom dovria questas datas. Entaifer 30 dis ston ins respunder sin questa brev per uschia scumandar a la Swisscom da duvrar las datas. Sch'ins na reagescha betg, va il nov contract en vigur, uschia che la Swisscom po duvrar las datas.

Autur/a: Prisca Bundi