Tge è da resguardar cu ins vul vender sur l'internet

Sur l'internet sa lascha vender fitg bler. Ma per optimar las schanzas ch'insatgi cumpra l'artitgel, datti in pèr trics.

La pagina da vender rauba Ricardo.ch
Legenda da maletgs: La pagina da vender rauba Ricardo.ch RTR, Lea Livers

Cun rumir si sa chatta en in lieu in pèr chalzers, in velo vegl u insatge auter ch'ins na dovra betg pli. Ma sche quel è anc en buna cundiziun, pertge betg metter quai online? E per optimar las schanzas ch'insatgi cumpra l'artitgel, datti in pèr trics.

Il titel da l'inserat

En il titel vegnan en ina curta descripziun da l'artitgel. Marca, model e grondezza na dastgan er betg mancar. Tar in pèr chalzers da gimnastica fiss in bun titel par exempel: 'Chalzers da gimnastica dad Adidas, grondezza 45'. Detagls sco colur, stadi da l'artitgel etc. Sa scriva en la descripziun da l'artitgel u èn visibels en las fotos.

In tric è, da ponderar, sche jau tschertgass sez mes artitgel, tge pleds duvrass jau?

Descripziun da l'artitgel

Tut ils auters detagls, sco stadi da l'artitgel, donns, vegliadetgna, colur e material vegnan en la descripziun. Er quella dess esser bain chapibla e vardaivla, dimena betg notar chaussas, che na turnan betg. Sch'ins na sa tut las infurmaziun relevantas, saja era guardar sin la pagina d'internet dal producent da l'artitgel.

Fotografias

Impurtant èsi, da far fotografias cleras e chins enconuscha ils detagls. Il fund dess esser neutral. Ideal è ina paraid u ina maisa alba. Sin la fotografia dess be esser il product, autra rauba è da rumir davent.