Tge è in bun service en ina ustaria?

Ins vegn malapaina salidà dal persunal, amiaivlezza para mintgatant d'esser in pled ester en ustarias. In bun service vesa or auter, mangia Manfred Wagner. El era ditg sez camarier ed è ussa magister a la scola d'hotellaria a Passugg. Tenor el dovri 3 pitgas da basa per garantir in bun service. Sco emprim sto l'organisaziun da sura esser dada. Vul dir il persunal sto vegnir scolà e betg bittà en l'aua fraida. Secundo sto ina camariera ni in camarier esser amiaivel da natira e sco terz punct impurtant ston ils camariers conuscher la carta ed ils products ch'els vendan. Quai saja ina necessitad, di Manfred Wagner, independent sch'ins lavura en in hotel da 5 stailas ni en in pitschen restaurant.