Tge televisiun cumprar?

Pliras televisiuns ina sper l'autra en ina stizun.
Legenda da maletgs: Differentas televisiuns en stizun. DREAMSTIME

LCD, LED, OLED e Plasma. Quai èn differentas sorts televisiuns chins po cumprar ozendi. Er la grondezza e las funcziuns opziunalas ston ins resguardar avant cumprar ina nova televisiun. Nus avain discurri cun in tecnicher da RTR Radiotelevisiun Svizra Rumantscha. El ha pudì dar scleriment e forsa in zic orientaziun en las stizuns da televisiuns.

Tecnologia
Corsin Gadola cusseglia da cumprar ina televisiun cun LED. La qualitad saja la meglra. Las tecnologias da LCD e Plasma sajan gia passadas.

OLED è il successur da LED. Quella tecnologia empermetta anc in meglier maletg sin la televisiun. Cunquai che quai è insatge nov, na cusseglia Corsin Gadola betg da cumprar televisiuns cun OLED anc betg! La tecnologia stoppia anc madirar.

Grondezza e furma
Era sche la pli grondas televisiuns vesan ora fitg attractivas, na duajan ins betg cumprar la pli gronda televisiun chins chatta. La grondezza ideala per la stiva individuala chattan ins ora cun mesirar la distanza tranter televisiun e canapé, respectiv da là nua chins guarda il pli savens televisiun. Quella distanza duajan ins parter cun 3 ed il resultat duai esser la medema mesira sco la autezza da la televisiun.

E pertutgant la furma manegia Corsin Gadola mo, chi na fa betg differenza sin la qualitad. Ins duai cumprar quai che plascha il meglier. Pia televisiuns plattas u televisiuns curvada, Uschenumnadas «curved tvs».

Funcziuns opziunalas
Cunquai che linternet e la televisiun sa vegnan adina pli da strusch cusseglia Corsin Gadola da cumprar televisiuns cun in attatg dinternet integrà. Uschia pon ins nizzegiar la gronda purschida online adina pli e pli cun la televisiun, sco per exempel HBBTV.

Autur/a: RTR