Siglir tar il cuntegn

Header

audio
Keystone
laschar ir. Durada: 3 minutas 28 Secundas.
cuntegn

Tschendra, fulin e tuffien en chasa – ed uss?

Cun in'inspecziun en chasa u abitaziun suenter in incendi decida la segiranza tge che vegn remplazzà u schubregià. Il brischament en il depot dals autos da posta ha spuventà ils abitants en vischinanza. Las consequenzas da l'incendi na sentan ins betg be en il center – i vegn donnegià massa rauba.

En in emprim pass sto il donn vegnir annunzià a l'assicuranza da la rauba da chasa e – sch'il donnegià è possessur da la chasa u l'abitaziun pertutgada – a l'assicuranza d'edifizis. Lura vegn l'uschenumnà inspectur da donns da la segirada sperasvi. Oravant tut tar gronds brischaments vegnia el anc accumpagnà dad in profi da sanaziuns ch'è spezialisà sin brischaments, declera Arnold Giger, agent general da l'Axa Winterthur a Glion. «Nus sclerin lura sch'igl è insumma pussaivel dad anc viver en l'abitaziun e tge ch'è donnegià quant ferm.»

Surpli dals custs cun pernottar vegn surpiglià

Sch'ina chaussa saja talmain donnegiada ch'ella sto vegnir remplazzada ubain sch'ella po era vegnir nettegiada, possian ins bunamain adina determinar cun in'egliada. «I dat era chaussas che nus empruvain ina giada da schubregiar u pinar, che ston alura tuttina vegnir dismessas.»

Ma tge sch'igl è gnanc pli pussaivel da restar en l'abitaziun suenter il brischament, sch'ins sto per exempel ir en in hotel? Tenor Arnold Giger surprenda la segirada il surpli dals custs. Quai vul dir: Uschespert che l'abitaziun n'è betg pli abitabla sto era il tschains betg pli vegnir pajà. Sch'ils custs entras las pernottaziuns en hotels daventian lura pli auts ch'il tschains ch' ins paja normalmain vegnia quai surpiglià.

Valur nova da la rauba è decisiva

La summa ch'è segirada stoppia constar, uschia l'agent d'assicuranzas vinavant. Decisiv per calcular questa summa saja la valur da la chaussa en il stadi nov u il pretsch. «Nus avain bler pli bler urden che quai che nus pensain», di el e cusseglia da pigliar avunda temp ed ir atras mintga stanza e scriver si tut.

Savens segirà summas memia bassas

I saja adina puspè il cas che la summa segirada saja memia pitschna, avertescha era Valentin Spescha, agent general da la Mobiliar a Cuira. Era sch'il cussegl dad era propi segirar ina summa auta avunda vegn da l'assicuranza che venda ils products – sin la premia n'haja quai betg in'influenza enorma, sincerescha el. «Mintgatant spargna la glieud en il fauss lieu, perquai che 50'000 francs segirads dapli u pli pauc fan ora enturn 150 francs sin la premia annuala.» Tar tut quai vegn vitiers che la premia sto esser pajada, uschiglio n' èn ins betg protegì. Quai vala dentant per tut las segiradas.

Dapli da «Co e cum»

Scrollar a sanestra Scrollar a dretga