Dovri in segund tunnel da via tras il Gottard?

Il tunnel da via tras il Gottard è sin ils onns e sto vegnir sanà urgentamain. Per evitar ch’el stoppia vegnir serrà per in lung temp, propona il Cussegl federal da bajegiar ordavant in segund tunnel. Applaus datti or dal Tessin che na vul betg vegnir isolà dal rest da la Svizra e da la regenza grischuna che ha tema dal traffic che guntgiss via la ruta dal San Bernardino durant il temp da la sanaziun. Ils adversaris d’in segund tunnel teman ch’i vegnia fatg flucs cun la protecziun da las Alps. Els na crain betg ch’il traffic vegniss a lunga vista manà propi be sin in vial tras mintga tunnel e vulan transferir il traffic sin las rodaglias durant la sanaziun dal tunnel. L’emna che vegn datti davart questa dumonda ina debatta fitg cuntraversa e plain emoziuns en il Cussegl naziunal. Gia ordavant sa duelleschan en l’emissiun «Controvers» da la Televisiun Rumantscha ils dus politichers da traffic or dal Grischun Martin Candinas, cusseglier naziunal da la partida cristiandemocrata e Josias Gasser, cusseglier naziunal da la partida verd-liberala.

RTR/dh