Il segund orizont

«Il segund orizont» raquinta da dus munds parentads: da la Val Schons d’antruras che na pudeva betg nutrir sia populaziun e che ha durant tschientaners sfurzà blers umens e bleras dunnas da viver en l’ester, da tschertgar lur fortuna en il lontan.

A Venezia, en las terras dal nord e da l’ost da l’Europa, pli tard en l’Australia ed en la California. Il segund mund è quel da las migrantas e dals migrants d’ozendi: carstgauns dal Portugal, dal Cosovo e da l'Italia che han stuì bandunar lur patria per chattar lavur en la Val Schons: en garaschas, sin plazzals, en cuschinas e chombras dad ustarias e hotels. In omagi filmic a las migrantas ed als migrants da qua e da là, dad oz e da pli baud, ina reflexiun davart la vita en l’ester sco «condition humaine».

Contribuziuns

  • Trailer

    La Val Schons han els bandunà en tschertga da la fortuna. Intgins han gì fortuna e chattà en l’America ina nova patria. Oz chattan novs immigrants en Val Schons ina patria.

RTR/sh