IMPORT EXPORT – Ils affars interessants da Mattias Bulfoni

Mattias Bulfoni è enconuschent sco possessur da la Clinica Holistica Engiadina – la clinica da burnout a Susch. Quest purtret cinematografic mussa tge ch’el ha fatg avant l’avertura da la clinica. L’emprim ha el emprendì da far al pur, suenter preparava el ils skis da Marie-Theres Nadig ed è stà sco trenader da Petar Popangelov en la Bulgaria communista. Mattias Bulfoni era importader general dad Adidas en Bulgaria e possedeva là, enfin avant in pèr mais, ina resgia. Oz ha el in nov project: cumprar e vender in milliun tonnas fier en furma da rodaglias veglias en l'Angola. Sin ina tura tras il lieu da skis bulgar Borovets, nua che Mattias Bulfoni ha fatg la gronda part da ses affars, raquinta el da ses contacts cun la mafia. Era el haja stuì cooperar, ma el n'haja mai pajà daners a la mafia. Persuenter haja el regalà a mintga chau impurtant in model da trener exclusiv dad Adidas. E l'um ch'è dapi 22 onns ses partenari da fatschenta en la Bulgaria di da Mattias Bulfoni: «Er ist wie mein Godfather.».

RTR/dh