In discurs cun Jürg Martin Gabriel

Il professer emerità per politologia Jürg Martin Gabriel da Vuorz è l’expert per la migraziun en la zona mediterrana. El è il giast en il «Discurs» da l’emissiun Cuntrasts da la Televisiun Rumantscha.
Quest onn han gia var 120’000 migrants traversà la Mar Mediterrana. 2000 persunas èn najentadas e mortas en la mar. Il project «www.blue-borders.ch» da Jürg Martin Gabriel documentescha il dumber da migrants, da persunas salvadas e da victimas en la Mar Mediterrana. En il discurs cun Rico Valär raquinta Jürg Martin Gabriel davart ils problems da la migraziun sur ils cunfins maritims tranter l’Africa e l’Italia, davart il traffic d’umans en Libia e las operaziuns da salvament da l’Italia. Jürg Martin Gabriel ha studegià politologia en l’America, ha instruì sco professer en il Camerun, a l’Universitad da Son Gagl ed a l’ETH da Turitg. Suenter è el stà directur da la Mediterranean Academy of Diplomatic Studies (MEDAC) a l’Universitad da Malta. Oz coordinescha el a Malta la furmaziun «tschertgar e salvar» per ils uffiziers da la guardia da costa da Tunesia.

RTR/dh