In’emna turbulenta a Ftan

L’Institut Otalpin a Ftan ha gì dis turbulents. Ils 21 da fanadur 2015 sa derasa numnadamain en il Grischun ina novitad sco in fieu: L’Institut Otalpin sto serrar sias portas. I mancan simplamain ils raps ed ils scolars. Ina scola media privata impurtanta per la regiun na dessi cun quai betg pli. Scolaras e scolars ston causa la decisiun dals 21 da fanadur ir a tschertgar in’autra scola per suenter las vacanzas da stad. Magistras e magisters han da tschertgar ina nova plazza da lavur. E la politica tschertga decleraziuns pertge che la serrada era apparentamain inevitabla.

E tuttenina datti moviment: ina gruppa da geniturs s’organisescha, rimna suttascripziuns e fa squitsch. La politica sto reagir e preschenta be in’emna suenter la serrada ina pussaivla soluziun transitorica: La vischnanca da Scuol cumpra l’edifizi e da vart privata datti in sustegn per surmuntar la gestiun da la scola. Ina strategia a lunga vista per l’avegnir da la scola sto però pir anc vegnir elavurada.

Dapli dal tema

RTR/td