In’experientscha musicala

Valeria Zangger (battaria), Martina Berther (bass electric), Ursina Giger (vusch), Niculin Janett (saxofon) ed Andi Schnoz (ghitarra electrica) èn sa scuntrads a Glion per realisar in project musical. Inspirads dad in’excursiun en la Ruinaulta creeschan ils tschintg musicists lur musica. Trais dis improviseschan ed exerciteschan els, a la fin datti in concert en il Cinema sil Plaz a Glion. Al cumenzament dal project ponderescha la bassista Martina Berther: «Er sch’jau hai gia sunà cun ils blers, è il resultat fitg intschert. Nus essan da chasa en differents stils da musica!». Ursina Giger sa dumonda: «Co tunan l’aua ed il crap?». Andi Schnoz sa lascha inspirar da la tschajera per crear sia musica. La percussiunista Valeria Zangger s’interessa per il tun da tut quai che vegn per mauns ad ella ed en la contribuziun musicala dal giuven saxofonist Niculin Janett pon ins observar la transfurmaziun d’ina chanzun rumantscha en in toc da jazz contemporan. Il film «In’experientscha musicala» dad Ivo Zen mussa la creaziun d’in toc musical, da l’idea iniziala fin a sia preschentaziun davant il public.

RTR/dh