Siglir tar il cuntegn
Inhalt

Cuntrasts La diocesa da Cuira: «In eldorado per exorcists»

Exorcissem n’è betg in fenomen da temps passads, ma actualitad reala en Svizra. Uschia er en la diocesa da Cuira: Qua emprovan emna per emna silmain trais exorcists episcopals, da stgatschar il demuni. Per il scienzià da religiun Georg Otto Schmid è Cuira schizunt in eldorado per exorcists.

Legende: Video Il demuni en il Grischun abspielen. Laufzeit 06:55 Minuten.
Or da Cuntrasts dals 15.03.2017.

En las pli diversas communitads religiusas vegn pratitgà er ozendi di per di exorcissem – vul dir vegnan stgatschads er malspierts or da chasas, animals e perfin persunas. Quai succeda tar baselgias libras ed en circuls esoterics sco era en la baselgia catolica.

A Cuira en tschertga dad exorcissem

En l’uvestgieu da Cuira lavuran silmain trais exorcists. Els han in permiss da l’uvestg per pudair far exorcissems e na dastgan betg pratitgar dador il territori da l’uvestgieu. Quai è ina da diversas reglas che la baselgia catolica ha mess si, per ch’i na dettia betg abus da la pratica da l’exorcissem.

Che quai è necessari mussan divers cas, ultimamain il favrer 2017. A Frankfurt è vegnida sentenziada ina dunna ad otg onns praschun. Ella vuleva stgatschar ensemen cun dus auters il diavel or dad ina quarta persuna. Quella persuna è alura vegnida per la vita.

Portrait.
Legenda: Christoph Casetti è l'exorcist uffizial da l'Uvestgieu da Cuira. RTR / Dominik Rupf

Mintg’emna dumondas, discurs u inscunters

I na saja betg simpel, dad eruir las cifras da quels che vegnan a Cuira per survegnir in exorcissem, raquinta Christoph Casetti da la diocesa sin dumonda da RTR. Casetti è exorcist uffizial da l’uvestgieu. Dapi onns declera el adina danovamain il fenomen da l’exorcissem ed è perquai l’exorcist il pli enconuschent da la Svizra. Er perquai è l’uvestgieu da Cuira ina da las primas adressas pertutgant exorcissems.

Cuira, «l’Eldorado da l’exorcissem»

Er il scienzià da religiun Georg Otto Schmid constatescha, ch’i dat adina dapli exorcissems – tant en las pli diversas comunitads spiritualas, sco er entaifer la baselgia catolica. L'augment en la baselgia catolica saja en emprima lingia, pervi che «umans, che derivan da pajais, nua ch’il exorcissem tutga tar il service da la baselgia catolica» spetgan quest service era, sch’els vegnan da lur pajais a star en Svizra.

Portrait.
Legenda: Georg Otto Schmid è scienzià da religiun e sectas al post da cussegliaziun Relinfo. RTR / Dominik Rupf

Er sche l’uvestgieu è fitg reservà cun furnir datas concretas, è per Schmid cler, che Cuira gioghia ina rolla impurtanta tar l’exorcissem en Svizra. Cuira è per el schizunt in «Eldorado per exorcissem», nua che fullas da persunas tschertgian agid e deliberaziun. «Quai sai jau betg da cifras concretas, ma da las reacziuns che nus udin sin noss post da cussegliaziun. Jau aud fitg savens da l’uvestgieu da Cuira. Tant n’aud jau da nagin auter lieu.»

Crair a l’existenza da demunis n’è betg collià cun ina concepziun dal mund

Per Christoph Casetti èn ils demunis ina realitad: Bain betg il diavel cun cornas, ma tuttina il nausch en furma activa ed en preschientscha spirituala. Ad in’intervista cun RTR ha el mo aderì suenter in discurs pli lung. Il fenomen da l’exorcissem saja memia cumplitgà, per declerar el mo en intginas frasas.

El saja dentant persvadì, ch’igl dettia dapli tranter terra e tschiel che mo quai che la scienzià sa. E sch’igl saja pussaivel, da cumbatter il nausch cun uraziuns, lura è Christoph Casetti er pront da far quai e da gidar uschia a persunas possedidas. Il fat, che las persunas sa sentian meglier suenter la procedura da l’exorcissem mussia, che exorcissem possia salvar da malspierts, è Casetti persvadì.

Ils ogetts numnads.
Legenda: Cun stola, manuals, aua benedida ed il crucifix cumbatta l'exorcist ils demunis. RTR / Dominik Rupf

L’exorcissem, ina da las praticas spiritualas las pli privlusas

Georg Otto Schmid admonescha dal privel da l’exorcissem. Quai saja, suenter la persecuziun directa, la pratica spirituala la pli privlusa insumma. Er sche cas mortals capitian dador la baselgia catolica, vesa el er ina responsabladad tar ella, numnadamain preparassi ella cun «la promoziun da la cretta a l’exorcissem il fund, sin il qual che tut ils exorcissems spontans, selvadis sa basan».

L’exorcist mexican a Samedan

Don Cesare Truqui è il spiritual da la missiun catolica da l’Engiadin’Auta, la «Missione Cattolica Engadina Alta». Er el constateschia, che la dumonda per exorcissems crescha. El haja mintga 15 dis ina dumonda. Quai na veglia betg dir, che tut quellas persunas, che s’annunzian hajan il demuni in ellas, i signifitgia dentant, ch’ellas hajan il basegn da sustegn spiritual: «Il fat, ch’i vegn tschertgà in spiritual è in termometer per la temperatura spirituala da las persunas».

Avant tschintg onns è Cesare Truqui vegnì da Roma ed ha surprendì la lavur pastorala da ses antecessur. A Roma era Don Cesare docent a l’universitad papala Regina Apostolorum. Ed in Italia ha el tant pratitgà sco er instruì l’exorcissem. Truqui ha emprais dals pli gronds, numnadamain da l’exorcist da la diocesa Roma, savens er numnà l’exorcist dal papa, Padre Gabriele Amorth barmier.

Portrait.
Legenda: Don Cesare Truqui è spiritual ed exorcist a Samedan. RTR / Dominik Rupf

A Samedan continua Truqui da pratitgar l’exorcissem. Curt suenter ch’el era arrivà en Svizra, aveva el survegnì il permiss da l’uvestg Vitus Huonder, che haja «chapì il basegns dad exorcists».

Exorcissem

En baselgia catolica n'è quai betg in act violent, ma l’emprova da stgatschar malspierts cun in ritus religius. Quai è ina seria dad uraziuns e benedicziuns. Tar persunas ha l’exorcist da sclerir, sch’i sa tracta insumma da demunis u dad ina malsogna psichica. Papa Francestg discurra adina puspè dal demuni, dentant betg directamain da l’exorcissem.

Cas pli enconuschent en Europa

Fanadur 1979: La studenta Anneliese Michel mora in Germania suenter 10 mais dad exorcissem cun spirituals catolics. Quai chaschuna ina discussiun internaziunala. Dapi lura fin oz èn ils uvestgieus tudestgs fitg precauts cun il tema exorcissem. En auters circuls culturals percunter, p.ex. en l’America latina, tutga il tema tar il mintgadi cristian.

Exorcists en il mund

L’onn 2014 ha il Vatican renconuschì l’associaziun internaziunala dad exorcists AIE. Confundatur ed emprim president era Padre Gabriele Amorth, l'exorcist da l'uvestgieu da Roma, «l'exorcist papal». L’associaziun è presenta en radund 30 pajais, uschia er en Svizra. Er Christoph Casetti da l'uvestgieu da Cuira è in dals commembers svizzers.