Nua èn zuppads ils stgazis?

Tut crescha e prosperescha – la primavaira è in veritabel stgazi. In stgazi? Nua èn propi zuppads ils stgazis? L’emissiun «Cuntrasts» mussa nua che quels stgazis èn zuppads: per exempel en Val Medel, en garaschas u perfin en vocabularis rumantschs.

Tar la tschertga da stgazis zuppads ha la redactura Isabelle Jaeger bain chattà in bel toc aur da la Surselva, ma ella è sa dumandada: Vai insumma vinavant cun l’exploraziun da l’aur en quella regiun? Avant quatter onns aveva ina firma canadaisa, la Swiss Gold Exploration AG, survegnì la concessiun per far retschertgas. Il facit: Actualmain marschi pauc.

Paula Nay ha filmà trais stgazis fitg persunals – numnadamain ils stgazis da Sandra Hendry, dad Enrico Bischoff e dad Ervin Huonder. Be tant saja tradì da lur istorgias: Enrico Bischoff ha survegnì ses stgazi or da la Resega a Lugano, Sandra Hendry numna ses stgazi «mia poppa» ed il stgazi dad Ervin Huonder vala passa 50’000 francs.

Da fotografias e pleds

Il redactur Arnold Rauch es ì a la tschertga dad in veritabel stgazi cultural, creà durant ils davos 50 onns a Tavau. Là abitava numnadamain la fotografa libra Lisa Gensetter che ha fotografà la vita da mintgadi en il Grischun dapi ils onns 1950. Il resultat è ina collecziun remartgabla da 50’000 fotografias, ina collecziun che vegn digitalisada actualmain.

Ina dumonda plitost particulara fa David Truttmann en sia contribuziun davart in stgazi che nus avain tuts en testa: Quants pleds ha il stgazi da pleds rumantsch? 10’000 pleds u 500’000 pleds? Igl è grev d’eruir ina cifra precisa e tuttina dattan intginas cifras da pensar.

Contribuziuns

  • «Mes stgazi è...» (Sandra Hendry)

    Trais persunas raquintan da lur stgazis persunals: Sandra Hendry.

  • Il «gold-rush» è anc lunsch davent

    La Swiss Gold Exploration AG ha ils dretgs per retschertgar aur sisum la Surselva. Al mument èsi però ruassaivel. Pertge atgnamain?

  • «Mes stgazi è...» (Enrico Bischoff)

    Trais persunas raquintan da lur stgazis persunals: Enrico Bischoff.

  • In vair stgazi fotografic

    La collecziun da fotografias da Lisa Gensetter vegn digitalisada e publitgada ussa – in vair stgazi che documentescha la vita da mintgadi en Grischun dapi ils onns 1950.

  • «Mes stgazi è...» (Ervin Huonder)

    Trais persunas raquintan da lur stgazis persunals: Ervin Huonder.

  • Quants pleds rumantschs datti?

    Nus avain ina massa da vocabularis, dicziunaris e pledaris. Ma savain nus quantifitgar quants pleds rumantschs ch’i dat insumma? Nus ristgain il test.

  • «Mes pled preferì è...» (supplement online)

    Tgenin pled or da l’enorm stgazi da pleds rumantsch plascha a vus il meglier?

  • E tge sa zuppa en il stgazi? (supplement online)

    Durant l’entira emissiun da Cuntrasts avevan nus plazzà in pitschen stgazi en il studio. Ma tge sa zuppa atgnamain en la stgatla?

  • Trailer

Dapli dal tema

RTR/gc