«Sas anc?»: Luisa Famos ed Oscar Peer

Gia as crajeva che Hitler saja mort, qua cumpara el puspè, e quai en il film. Quai ha scrit Friedrich Dürrenmatt curt suenter la guerra. Per fortuna na cumparan betg be ils nauschs, mabain era ils buns spierts en films vegls.

Perquai cunvegn la tschertga da films vegls en l’archiv da RTR adina puspè, era sch’ins na chatta betg adina in stgazi.

Sur da la poetessa ladina Luisa Famos, ch’è morta baud (1974), na datti malavita nagin film. Tuttina han dus redacturs da la Televisiun Rumantscha (Claudia Knapp e Gian Andrea Reinalter) ristgà da s’avischinar en moda plitost expressiunistica a la dunna che ha purtà musica en la litteratura rumantscha. Ins na vesa betg ella, auter che sin fotografias, ma ins auda il tun sonor da sia poesia.

Pli fortunà è il tschertgastgazis en l’archiv da films, cur che l’autur è vegnì purtretà en vita. Quai vala per il scriptur, mort dacurt, l’Engiadinais Oscar Peer, che ha deditgà sia prosa als marginals, rebels, assassins, stgatschads ed autras figuras a l’ur da la societad. En il film raquinta Peer da sias ovras e sia atgna cumbatta cunter l’ingiustia e la suldina.

Contribuziuns

  • Trailer

Dapli dal tema

RTR/td