Sgular senza cunfins?

Essas vus sgulads en vacanzas questa stad? U avais vus be laschà sgular voss patratgs? La redacziun dals Cuntrasts sgola en pliras direcziuns tras l’emprima emissiun suenter la stad: cun dronas, cun aviuns u perfin ensemen cun tschess barbets.

Ellas sgolan adina pli savens e mintga uffant po cumprar in tal apparatin: ina drona. Er l’armada e la polizia sgolan regularmain cun dronas. E perquai è noss redactur Casper Nicca ì a guardar nua che las autoritads statalas fan atgnamain diever da quels objects sgulants e tge ch’ellas astgan insumma filmar.

La redactura e pilota da hobi Paula Nay, è sgulada questa stad cun in aviun senza motor (aviun a vela) ed ha perfin fatg intgins loopings. Ma avant ses sgol ha ella laschà montar ad in cardiolog apparaturas per mesirar las capriolas da ses cor. Nus mussain ils resultats.

In sgol ch’ha midà sia vita
In accident cun in helicopter l'avust dal 1979 ha midà la vita da Jon Pünchera, in giuven bab oriund da la Val Müstair. Anna Serarda Campell l’ha visità ed ha scuntrà in um che n’ha betg pers la veglia da viver, malgrà tut ils numerus culps da destin.

As regurdais vus anc dals emprims tschess barbets ch’eran vegnids mess en libertad avant exact 25 onns en il Parc naziunal svizzer? En il fratemp vivan passa 200 da quels utschels en las Alps. Ils dus pli frestgs èn actualmain en las Baronnies en la Provence. Noss redactur Ruedi Bruderer als ha filmà en Frantscha e declera en sia reportascha tge che quella colonia da tschess barbets ha da far cun sia parentella en Svizra.

Contribuziuns

  • Las dronas èn dapertut

    Pertge e nua dovran armada e polizia lur dronas? E tge astgan las autoritads statalas insumma filmar or da l’aria? – Casper Nicca ha las respostas.

  • Il cor durant il sgol

    Tge capita atgnamain cun noss corp e cor durant in sgol, p.ex. durant sgular in looping? Nossa redactura e pilota da hobi Paula Nay ha fatg il test.

  • In sgol ch’ha midà sia vita

    Avant var 40 onns è Jon Pünchera crudà giu cun in helicopter. E quel accident ha mess sin il chau cumplettamain la vita dal giuven bab.

  • Ils tschess barbets èn turnads – era en Frantscha

    Ils davos 30 onns èn vegnids reintroducids cun success ils tschess barbets en las Alps. Questa stad èn dus ulteriurs tschess vegnids mess en libertad en la Haute Provence en Frantscha – e quels han ina colliaziun cun ils tschess grischuns.

  • Trailer

Dapli dal tema

RTR/td