«Stgelas en pocas qua» – Il davos pur da Casti chala per adina

Nagin pur pli en vischnanca? Quai è il destin d’adina dapli vischnancas grischunas. Ma tge munta quai, sche la midada da structura n’è betg mo in tema abstract da discussiun, mabain in fatg concret? Casper Nicca va a la tschertga da respostas cun ses purtret filmic dal davos pur da Casti.

Casti è ina pitschna vischnanca muntagnarda sin la Muntogna da Schons, cun mo radund 20 abitants. E Casti è durant tut sia existenza stada ina vischnanca da purs. Tgi che viveva qua, viveva da la terra, dal funs enturn il vitg, da l’agricultura. Quai è adina stà uschia – enfin avant in onn. Enfin ch'il davos pur da Casti, Domenig Dolf (82), ha decidì da chalar. Quant ditg fa el anc il pur? Tge schabegia insumma cun ina vischnanca, sch’il davos pur chala? Tge munta quai, sche la midada da la structura è terminada?

Casper Nicca, che viva sez era a Casti, ha observà durant passa in onn quest process cun sia camera. El ha filmà co che la decisiun da chalar è madirada tar il pur da Casti. El ha era filmà co che la davosa vatga ha bandunà la stalla da Domenig Dolf. Ed el ha laschà raquintar ils auters abitants, tge che quai munta per els.

Il film «Stgelas en pocas qua» è in sguard intim, fin ed original sin ina midada da l'agen conturn, sin il davos e decisiv pass da la midada da structura d’in vitg. Casti e Domenig Dolf èn mo exempels per blers auters lieus ed autras persunas en il Grischun.

Contribuziuns

  • Trailer

  • Version mit deutschen Untertiteln

RTR/td