Crest dal tgiet

Forsa guardais Vus oz la cursa aval a Kitzbühel en Austria, ina da las pli difficilas dal mund. La muntogna, nua ch'ils skiunzs van giu sa cloma oz Hahnenkamm, ma ils indigens la numnan anc «Halikampl». Kampl signifitgescha il medem sco Kamm, damai in petgen. Sche ina muntogna ha quella furma, la numnain nus en la Rumantschia il crest u la cresta u la craista. Da quellas datti en il Grischun a mantun, era Crestaultas u Crestas grondas u Crests la Crusch. La flur che sa numna grusaida en Engiadina è en Surselva la crestatgiet u la striauna, ma i dat era la varianta cun las flurs albas, il crestgetalv.